ИБХИТМ вакиллари Малайзия Миллий университети қошидаги “Ислом цивилизацияси институти” ва “Малайзия исломни англаш институти” масъуллари билан учрашди

ИБХИТМ вакиллари Малайзия Миллий университети қошидаги “Ислом цивилизацияси институти” директори проф. Дато доктор Моҳд Юсуф Усмон  ва  “Малайзия исломни англаш институти”  директори Датук, проф. идок. Азизан Баҳаруддин билан учрашди. Учрашувда икки томонлама илмий-тадқиқот ишларини олиб боришда халқаро алоқаларни ўрнатиш, зиёрат туризмини ривожлантириш, ислом динини кенг тарғиб этиш, буюк алломалар ҳаёти ва илмий меросини ўрганишда ҳамкорлик ишларини йўлга қўйиш каби масалалар юзасидан келишиб олинди.

Дато доктор Моҳд Юсуф Усмоннинг таъкидлашича: “Ўзбекистон – кўплаб алломаларни етиштириб берган замин. Биз бу юртдан чиққан Имом Бухорий, Имом Термизий, Имом Мотурудий, Ибн Сино, Маҳмуд Хоразмий, Беруний, Мирзо Улуғбек каби алломаларни диний ва дунёвий фанлар тараққиётига катта ҳисса қўшганлигини биламиз. Бу алломаларнинг илмий меросини ўрганиш биз учун ҳам муҳим. Бу борада биз ҳамкорликка тайёрмиз”, – деди.

Датук, проф. Азизан Баҳаруддин: “Малайзия учун Ўзбекистон билан илмий-тадқиқот ишларида ҳамкорлик қилиш манфаатли. Шунингдек, Ўзбекистонга умра ва ҳаж сафари олдидан зиёратнинг ташкил этилиши ҳам биз учун қувонарли. Биз бу зиёрат орқали Ўзбекистонни ва халқимиз орзуси бўлган Имом Бухорийдек муҳаддисни зиёрат қилишга эришамиз”, – деб таъкидлади. 

Икки томонлама ўтказилган суҳбат жараёнида келажакда қуйидаги масалаларни амалга ошириш юзасидан ҳамкорлик ишларини олиб бориш учун келишиб олинди:

- “Ислом цивилизацияси институти”да илмий ходимларнинг билим-савиясини ошириш бўйича ўқув семенар тренинглар ташкил қилиш;

- Малайзия қўлёзма фондларида сақланаётган Мовароуннаҳр алломаларининг  ҳаёти ва илмий меросига оид қўлёзмаларни ҳамкорликда тадқиқ қилиш;

- Ислом динининг жамиятда ва ижтимоий-ахлоқий масалаларни ўрганиш ҳамда тадқиқ этиш масаласида ҳамкорлик ишларини олиб бориш;

- Мовароуннаҳрлик алломаларнинг ҳаёти ва илмий мероси бўйича  фильмлар олиш ҳамда телерадио кўрсатувлар тайёрлашда ҳамкорлик қилиш.

ИБХИТМ билан Малайзия Миллий университети қошидаги “Ислом цивилизацияси институти” ҳамда “Малайзия исломни англаш институт”лари ўртасида  ислом цивилизация ва алломаларнинг ҳаёти ва маънавий-меросини ўрганишга қаратилган илмий-тадқиқот ишларида икки томонлама алоқаларни ўрнатиш ва халқаро конференция, илмий-амалий анжуманлар  ташкил этиш бўйича келишиб олинди.