Китоблар тақдимотига таклиф этамиз

Ўзбекистон Республикаси Вазирлар Маҳкамаси ҳузуридаги Имом Бухорий халқаро илмий-тадқиқот маркази ва Алишер Навоий номидаги Ўзбекистон Миллий кутубхонаси ҳамкорлигида “Самарқанд алломалари”, “Самарқанд ёдгорликлари” ва “ИШИДнинг ботил ғоялари ва уларга раддиялар” китобиларининг тақдимоти 2018 йил 29 март куни соат 15.00 да Тошкент шаҳридаги Алишер Навоий номидаги Ўзбекистон Миллий кутубхонасининг кичик залида ўтказилади.

 Шовосил Зиёдов ва Қодирхон Маҳмудовлар томонидан “Самарқанд алломалари” ва Шуҳрат Қулматов ва Амриддин Бердимуродовлар томонидан “Самарқанд ёдгорликлари” китоблари тайёрланди.

Мазкур китобларда Самарқанд вилоятининг бой тарихи, улуғ алломалари, маданий объектлари ҳақида батафсил тарихй маълумотлар берилган. Вилоятда мавжуд зиёратгоҳлар, маданий меросга оид иншоотлар ҳақида маълумотлар берилиши билан бирга тарихий ҳамда замонавий суратлар билан безатилган.

 “Самарқанд ёдгорликлари” китобига муаллифлар томонидан Самарқанд вилоятида мавжуд маданий объектлар, зиёратгоҳлар ҳамда буюк аждодларимиз томонидан бунёд этилган иншоотлар тарихива суратлари киритилган.

 “Самарқанд алломалари” китобига ишончли манбалар асосида илмий асосланган тарихий маълумотлар ҳам киритилди. Китобнинг тайёрланиш жараёнида Самарқанддан етишиб чиққан алломалар тарихи ва улар томонидан қолдирилган илмий-маънавий мероснинг кенг кўламда ўрганилиши натижасида олинган муҳим маълумотлар ҳам киритилди. Тадқиқот натижасида бир қанча ҳали кенг илмий жамоатчиликка маълум бўлмаган буюк шахслар, аллома ва мутафаккирлар тарихи ҳам ўрганилиб, илмий муомалага киритилди.

“ИШИДнинг ботил ғоялари ва уларга раддиялар” китоби Доктор Имодуддин Хийтий қаламига мансуб бўлиб, Алоуддин Хофий томонидан таржима қилинган ва изоҳлар берилган. Мазкур китобда бугунги кунда ўзларининг ботил ғояларини илгари суриб, “такфир, жиҳод, ҳижрат, байъат, тоғут, халифалик” сингари чақириқлар билан дунё афкор оммасини ташвишга солаётган барча ёт диний оқимларга нисбатан “жаҳолатга қарши маърифат” услубида раддиялар берилган. Китоб диний мутахассислар, профилактика ишлари билан шуғулланувчи соҳа хизматчилари, диний-маърифий ишлар бўйича маслаҳатчилар ҳамда маърифий ишлар билан машғул бўлган юртдошларимизга мўлжалланган.

Мазкур китобларнинг нашр этилиши жамият аъзоларини, хусусан ёшларда миллий ғурурини, дунёқарашини такомилига етказида, мактаб ва лицей ўқувчиларини, коллеж ва олийгоҳ талабалари, илмий тадқиқот маркази тингловчи-тадқиқотчилари, тарихчи ва манбашунослар учун манбавий асос бўлиб хизмат қилади.