Имом Бухорий халқаро илмий-тадқиқот маркази билан Саудиядаги “Сунна ва турос ан-набавий маркази” ўртасида илмий-тадқиқот ва қўлёзмаларни ўрганиш бўйича ҳамкорлик ишлари йўлга қўйилди

Жорий йилнинг 1–5 июлъ кунларида Малайзия Республикасида бўлиб ўтган “Қўлёзмалар ва тарихий ҳужжатларга бағишланган иккинчи халқаро конференция” ва “Қўлёзмаларни ўрганиш усуллари” бўйича ўтказилган семинар-тренинглар асносида ИБХИТМ вакиллари Саудия Арабистони Подшоҳи Малик Абдулазиз университети қўлёзмалар фонди мудири Шайх Абдуллоҳ ибн Муҳаммад ал-Муниф билан ўзаро илмий-амалий ҳамкорликларни йўлга қўйиш мақсадида суҳбатлашишди. 

Суҳбат давомида Шайх Абдуллоҳ ибн Муҳаммад ал-Муниф томонидан ИБХИТМни ташкил этилганлигидан мамнунлиги, Марказ билан ҳар томонлама илмий-амалий, ҳамда қўлёзмаларни ўрганиш бўйича алоқаларни ўрнатиш учун тайёрлигини билдирди. Шунингдек, Шайх ўз кутухонасида  50 мужаллад қўлёзмалар каталоги мавжудлиги  ва унда кўплаб Мовароуннаҳрлик алломаларнинг маънавий меросига оид қадимий қўлёзмалар борлигини маълум қилиб: “Мовароуннаҳр алломалар шаҳри, улар томонидан қолдирилган бой илмий мерос бугун барча қўлёзмалар фондини олтин хазинасига айланган”, - деди. 

Мазкур тадбир жараёнида яна бир муҳим ҳужжат имзоланди. Саудиядан таклиф этилган  “Сунна ва турос ан-набавий маркази”  мудири, Шайх Мажид ибн Муҳаммад ал-Жуҳаний томонидан ИБХИТМ билан Имом Бухорий, Имом Термизий ва бошқа муҳаддислар ҳаёти ва маънавий меросини тадқиқ этишда халқаро ҳамкорлик алоқаларини ўрнатиш таклифи билдирилди. Шайх “Саҳиҳул-Бухорий” асари қадимий қўлёзма нусхалари ва унга ёзилган шарҳлар ва муҳаддисларнинг ҳаёти ва илмий мероси бўйича ИБХИТМ вакиллари билан фикр алмашди. Унинг таъкидлашича “Сунна ва турос ан-набавий маркази” яъни “суннат ва набавий меросини ўрганиш маркази” суннат ва пайғамбар ҳаёти ҳамда муҳаддисларнинг ҳаёти ва маънавий меросини ўрганиш, улар устида кенг тадқиқотлар олиб боришга ихтисослашган. Шу йўналишда тадқиқот қилаётган илмий изланувчилар билан илмий-амалий ҳамкорлик қилиш марказнинг асосий вазифаларидан бири эканлигини айтиб, ИБХИТМ ва “Сунна ва турос ан-набавий маркази” марказларининг муштарак вазифаларидан келиб чиқиб, икки илмий муассаса ўртасида маънавий меросни ўрганиб тадқиқ қилиш, қўлёзмалар тарихи, тури ва мазмунини ўрганиш ва илмий ходимларни малакасини оширишда илмий-амалий ҳамкорлик қилиш таклифи билдирилди.

Шундай қилиб қўлёзмаларни тадқиқ этиш бўйича яна бир муҳим ҳужжат, Имом Бухрий халқаро илмий-тадқиқот маркази билан Саудиядаги “Сунна ва турос ан-набавий маркази” ўртасида илмий-тадқиқот ва қўлёзмаларни ўрганишда ҳамкорлик ишларини йўлга қўйиш юзасидан икки томонлама келишув меморандумдан олдинги келишув имзоланди. 

Маълумот учун “Сунна ва турос ан-набавий маркази” илмий маркази 2017 йилда Саудия Арабистони Жидда  шаҳрида ташкил этилган. Марказнинг асосий мақсади ҳадис ва муҳаддислар ҳаётини ўрганиш, ҳадис илмига оид қўлёзма асарларни тадқиқ этиш ҳамда шу йўналишда илмий тадқиқотчиларни қўллаб-қувватлашдан иборат. Шунингдек, Марказда қўлёзмаларни ўрганиш, ҳадис илмига оид ҳар хил ўқув давралари ҳам ташкил этилиб борилади. Марказ ўз сайти ва илмий журналига эга бўлиб, диний-маърифий нашр ишларини ҳам олиб боради.