“Ўрта аср шарқ алломалари ва мутафаккирлари тарихий-фалсафий мероси энциклопедияси” тақдимотига таклиф этамиз

Сизни Имом Бухорий халқаро маркази, Ўзбекистон Республикаси Вазирлар Маҳкамаси ҳузуридаги “Фан ва технологияларни ривожлантиришни мувофиқлаштириш” қўмитаси, Ўзбекистон мусулмонлари идораси ва Алишер Навоий номидаги Ўзбекистон Миллий кутубхонаси ҳамкорлигида ўтказиладиган “ЎРТА АСР ШАРҚ АЛЛОМАЛАРИ ВА МУТАФАККИРЛАРИ ТАРИХИЙ-ФАЛСАФИЙ МЕРОСИ ЭНЦИКЛОПЕДИЯСИ” тақдимотига таклиф этамиз.

 Имом Бухорий халқаро маркази, Дин ишлари бўйича қўмита, Ўзбекистон мусулмонлари идораси, Алишер Навоий номидаги Ўзбекистон Миллий кутубхонаси, Ўзбекистон Республикаси Вазирлар Маҳкамаси ҳузуридаги “Фан ва технологияларни мувофиқлаштириш” қўмитаси ҳамкорлигида “Ўрта аср шарқ алломалари ва мутафаккирлари тарихий-фалсафий мероси энциклопедияси” китобининг тақдимоти 2017 йил 10 февраль куни куни соат 15.00 да Тошкент шаҳрида Алишер Навоий номидаги Ўзбекистон Миллий кутубхонасининг фаоллар залида ўтказилади.

Ўзбекистон Республикаси Вазирлар Маҳкамаси ҳузуридаги “Фан ва технологияларни ривожлантиришни мувофиқлаштириш” қўмитасининг 2015 йил 25 февраль куни тасдиқланган И-2015-1-20 “Ўрта аср Шарқ алломалари ва мутафаккирларининг тарихий-фалсафий мероси энциклопедияси” мавзусидаги ижтимоий-гуманитар фанлари йўналишидаги инновацион давлат гранти ижроси Имом Бухорий халқаро маркази илмий ходимлари томонидан т.ф.н. Ш.Ю. Зиёдов илмий раҳбарлигида бажарилди.

Лойиҳа иши 2015-2016 йиллар давомида бажарилиб, тадқиқотнинг олиб борилишида Имом Бухорий халқаро маркази илмий ходимларидан жами 14 нафар профессор, фан номзодлари, илмий ходимлари, техник муҳаррир ва дизайнерлари иштирок этди.

“Ўрта аср Шарқ алломалари энциклопедияси”га VIII-XVI асрларда яшаган 650 дан зиёд Шарқ аллома ва мутафаккирлари ҳақидаги тарихий маълумотлар киритилган. Энциклопедиянинг ҳажми 612 саҳифа 38.25 (б/т.)дан иборат бўлиб, “Munis design group” МЧЖ босмохонасида 2016 йил декабрда нашр этилди.

“Ўрта аср шарқ алломалари энциклопедияси” мавзуидаги инновацион Давлат дастури бўйича 2015-2016 йиллар давомида лойиҳа иштирокчилари томонидан энциклопедияга тарихий маълумотлар тайёрланиши билан бирга илмий мақолалар, китоб ва рисолалар ҳам нашр этилди. Лойиҳа жараёнида юртимиздан етишиб чиққан алломалар тарихи ва улар томонидан қолдирилган илмий-маънавий мероснинг ўрганилиши кенг кўламда амалга оширилиб, муҳим маълумотлар қомусга киритилди. Тадқиқот натижасида ҳали ўрганилмаган бир қанча янги буюк шахслар, аллома ва мутафаккирлар тарихи ўрганилиб, илмий муомалага киритилди.

“Ўрта аср шарқ алломалари ва мутафаккирларининг тарихий-фалсафий мероси энциклопедияси” лойиҳасини амалга оширилишида юртимиз олимлари ва тарихчилари томонидан ёзилган китоб ва илмий мақолалар, хорижий ва маҳаллий энциклопедия ва қомусий китоблардан кенг фойдаланган ҳолда бажарилди. 

Лойиҳа иштирокчилари томонидан 2015-2016 йиллар давомида юртимиздан чиққан буюк алломалар тарихи ва илмий меросига бағишланган 13 та китоб ва рисолалар ўзбек, рус ва инглиз тилларида нашр этилиб, 100 дан зиёд мақолалар хорижий ва маҳаллий матбуотларда эълон қилинди.

Энциклопедия жамият аъзоларини, хусусан, ёшларнинг миллий ғурурини, дунёқарашини такомилига етказилишида, мактаб ўқувчилари, коллеж ва лицей, университет ва институт талабалари, илмий тадқиқот марказлари илмий тадқиқотчилари, тарихчи ва манбашунослар учун манбавий асос бўлиб хизмат қилади.

 “Ўрта аср шарқ алломалари энциклопедияси” давлат гранти асосида олиб борилган тадқиқотлар асосли ва бугунги кун талабидан келиб чиққанлиги ҳамда мазкур лойиҳа илмий янгилик эканлигидан келиб чиқиб, лойиҳанинг бажарилиши ва унинг ҳаётга татбиқ этилиши инновация жараёни билан узвий боғланганлигини ҳисобга олиб лойиҳа ишини амалиётга татбиқ этилиши мақсадга мувофиқ.

“Ўрта аср шарқ алломалари энциклопедияси”нинг Имом Бухорий халқаро маркази илмий ходимлари томонидан 2016 йил Республикамиз мустақиллигининг 25 йиллик тўйи кенг нишонланган қутлуғ санада бажарилиши юртимизнинг чорак асрлик тўйига маънавий хазина сифатида туҳфа этилди. 

Китоб тақдимотининг олиб борилиши: Тақдимот академик-олимлар, профессор-ўқитувчилар, мутахассислар, тингловчилар, талабалар ва кенг жамоатчилик иштирокида ўтказилиб, оммавий ахборот воситалари орқали кенг ёритилиши кўзда тутилган.

Тақдимот 2017 йил 10 феврал куни соат 15:⁰⁰да Тошкент шаҳридаги Алишер Навоий номидаги Ўзбекистон Миллий кутубхонасининг фаоллар залида бўлиб ўтади.